นกุสลํ นอปริยาปนฺนํ ธมฺมํ ปจฺจยา กุสโล อปริยาปนฺโน ธมฺโม อุปฺปชฺชติ เหตุปจฺจยาฯ นกุสลํ นอปริยาปนฺนํ ธมฺมํ ปจฺจยา อพฺยากโต อปริยาปนฺโน ธมฺโม อุปฺปชฺชติ เหตุปจฺจยาฯ ทฺเวฯ (อกุสลมูเล ทฺเว, ทุกมูเล ทฺเวฯ)… เหตุยา ฉฯ

1-97. กุสลตฺติก-นิยฺยานิกทุกํ

[33] นกุสลํ นนิยฺยานิกํ ธมฺมํ ปจฺจยา กุสโล นิยฺยานิโก ธมฺโม อุปฺปชฺชติ เหตุปจฺจยา… เหตุยา ตีณิฯ

นกุสลํ นอนิยฺยานิกํ ธมฺมํ ปฏิจฺจ อพฺยากโต อนิยฺยานิโก ธมฺโม อุปฺปชฺชติ เหตุปจฺจยาฯ นอพฺยากตํ นอนิยฺยานิกํ ธมฺมํ ปฏิจฺจ อพฺยากโต อนิยฺยานิโก ธมฺโม อุปฺปชฺชติ เหตุปจฺจยาฯ นอกุสลํ นอนิยฺยานิกญฺจ นอพฺยากตํ นอนิยฺยานิกญฺจ ธมฺมํ ปฏิจฺจ อพฺยากโต อนิยฺยานิโก ธมฺโม อุปฺปชฺชติ เหตุปจฺจยาฯ เหตุยา ตีณิฯ

1-98. กุสลตฺติก-นิยตทุกํ

[34] นกุสลํ นนิยตํ ธมฺมํ ปจฺจยา กุสโล นิยโต ธมฺโม อุปฺปชฺชติ เหตุปจฺจยา… (อปริยาปนฺนสทิสํ ฉ ปญฺหา)ฯ

นกุสลํ นอนิยตํ ธมฺมํ ปฏิจฺจ อพฺยากโต อนิยโต ธมฺโม อุปฺปชฺชติ เหตุปจฺจยาฯ นอกุสลํ นอนิยตํ ธมฺมํ ปฏิจฺจ อพฺยากโต อนิยโต ธมฺโม อุปฺปชฺชติ เหตุปจฺจยาฯ นอพฺยากตํ นอนิยตํ ธมฺมํ ปฏิจฺจ อพฺยากโต อนิยโต ธมฺโม อุปฺปชฺชติ เหตุปจฺจยาฯ นกุสลํ นอนิยตญฺจ นอพฺยากตํ นอนิยตญฺจ ธมฺมํ ปฏิจฺจ อพฺยากโต อนิยโต ธมฺโม อุปฺปชฺชติ เหตุปจฺจยาฯ นอกุสลํ นอนิยตญฺจ นอพฺยากตํ นอนิยตญฺจ ธมฺมํ ปฏิจฺจ อพฺยากโต อนิยโต ธมฺโม อุปฺปชฺชติ เหตุปจฺจยาฯ เหตุยา ปญฺจฯ

1-99. กุสลตฺติก-สอุตฺตรทุกํ

[35] นกุสลํ นสอุตฺตรํ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยาฯ นอกุสลํ นสอุตฺตรํ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยาฯ

นอพฺยากตํ นสอุตฺตรํ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยาฯ นอกุสลํ นสอุตฺตรญฺจ นอพฺยากตํ นสอุตฺตรญฺจ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยาฯ นกุสลํ นสอุตฺตรญฺจ นอกุสลํ นสอุตฺตรญฺจ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยาฯ เหตุยา ปญฺจฯ

นกุสลํ นอนุตฺตรํ ธมฺมํ ปจฺจยา กุสโล อนุตฺตโร ธมฺโม อุปฺปชฺชติ เหตุปจฺจยา… (สํขิตฺตํฯ) เหตุยา ฉ…เป.… วิปาเก ตีณิ…เป.… อวิคเต ฉฯ

1-100. กุสลตฺติก-สรณทุกํ

[36] นกุสลํ นสรณํ ธมฺมํ ปจฺจยา อกุสโล สรโณ ธมฺโม อุปฺปชฺชติ เหตุปจฺจยา… เหตุยา ตีณิฯ

นกุสลํ นอรณํ ธมฺมํ ปฏิจฺจ อพฺยากโต อรโณ ธมฺโม อุปฺปชฺชติ เหตุปจฺจยาฯ นอพฺยากตํ นอรณํ ธมฺมํ ปฏิจฺจ อพฺยากโต อรโณ ธมฺโม อุปฺปชฺชติ เหตุปจฺจยาฯ นกุสลํ นอรณญฺจ นอพฺยากตํ นอรณญฺจ ธมฺมํ ปฏิจฺจ อพฺยากโต อรโณ ธมฺโม อุปฺปชฺชติ เหตุปจฺจยาฯ เหตุยา ตีณิฯ

2-1. เวทนาตฺติก-เหตุทุกํ

[37] นสุขาย เวทนาย สมฺปยุตฺตํ นเหตุํ ธมฺมํ ปฏิจฺจ สุขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ นสุขาย เวทนาย สมฺปยุตฺตํ นเหตุํ ธมฺมํ ปฏิจฺจ ทุกฺขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ นสุขาย เวทนาย สมฺปยุตฺตํ นเหตุํ ธมฺมํ ปฏิจฺจ อทุกฺขมสุขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยาฯ ตีณิฯ

นทุกฺขาย เวทนาย สมฺปยุตฺตํ นเหตุํ ธมฺมํ ปฏิจฺจ ทุกฺขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยา… ตีณิฯ

นอทุกฺขมสุขาย เวทนาย สมฺปยุตฺตํ นเหตุํ ธมฺมํ ปฏิจฺจ อทุกฺขมสุขาย เวทนาย สมฺปยุตฺโต เหตุ ธมฺโม อุปฺปชฺชติ เหตุปจฺจยา… ตีณิฯ